Isumaqatigiinniarnerit pillugit ilisimatitsinerup eqikkarneqarnera

Tusagassiuinermik Sulisut akissarsiaat pillugit TP-ip Namminersorlutik Oqartussallu isumaqatigiinniarneranni killiffimmik ilisimatitsineq pivoq sisamanngormat februaarip qulingiluaanni 2017. Ilaasortat ilisimatitsinermut takkuttut 16-18-illu akornanniipput - amerlanerit KNR-imeerlutik.

Namminersorlutik Oqartussat akissarsiat pillugit isumaqatigiinniarnermi ukiunik sisamanik sinaakkuserlugu akissaatit 3%-imik qaffaavigineqarnissaannik, imaluunniit ukiunik pingasunik sinaakkuteqassagunik 2%-imik qaffaavigineqarnissaannik imaluunniit – pingajuattut; ukiunut marlunnut isumaqatigiissuteqarnermi akissarsianik qaffaasoqassannginnissaanik neqerooruteqarput.

Namminersorlutik Oqartussat taama neqerooruteqarnerat TP-mit akuersaarnartinneqanngilaq, neqeroorutigineqartut akissarsiaviusup pisissutaasinnaanerulernissaanik nassataqarvianngimmata, soorlu akissarsiat pillugit siuliini isumaqatigiinniarnerit taama inerneqartarsimasut. Isumaqatigiinniarnerni angusarineqartut aaqqissuisoqarnermut tunngassuteqarnerusimapput.

Akissarsiat pillugit isumaqatigiinniarnerit killiffiannik ilisimatitsinermut peqataasunit Namminersorlutik Oqartussanit neqeroorutigineqartut isumaqatigineqanngimmata Tusagassiortut Kattuffiata (DJ) isumaqatigiinniarnernut akuliutsinneqarnissaa siunniunneqarpoq.