10. nov 2020 16:20 Kreds7

TP-mit nutaarsiassat - maajimi 2020

Asasavut ilaasortat ...
Kingullermik nutaarsiassanik nassiussinitsinnit sivitsorpoq. Nalunngisassitut ukiumoortumik ataatsimeersuarpugut marsimi, tassanilu siulersuisut nutaanik marlunnik ilataarput; Malu Pedersen & Karline Platou. Siulittaasoorusuttumik sassartoqanngimmat siulittaasumik qinersinngitsoorpugut, aningaaserisullu akisussaaffik tigummigallarpaa. Aalajangerneqarpoq immikkut ittumik ataatsimeersuarnermi siulittaasussarsioqqissasugut, tamannalu pissaaq sisamanngornermi juunip 4-ani nal. 19.00. Sumiinnissarput kingusinnerusukkut nalunaarutigineqarumaarpoq. Siulersuisut sisamaannaammata sinniisussaq siulleq Mads Lynge siulersuisuni suleqataalerpoq.

Siulittaasussarsiornissaq
Siulersuisut ilungersortumik kaammattuutigaat siulittaasumik katersuuffigisinnaasatsinnik ilumoortumillu nassaarsioqataaqqullusi. Nerioqaagut tamatumuuna iluatsitsisiumaarluta sassarusuttorlu/tullu juunip aallaqqaataatinnagu nalunaariissapput.

Akissarsiat pillugit isumaqatigiinniarnerit
Naam. Oqartussanut kommuninullu isumaqatigiissuterput upernaaq manna atorunnaarpoq, akissarsiallu qaffaataat kingulleq 1/4 tunniunneqarpoq. Akissarsiavit allagartaat misissoruk eqqortumik regulererneqarsimanersoq, taamaanngippat akissarsialeriffik sulisut sinniisaalluunniit saaffigisinnaavatit. isumaqatigiissut nittartakkatsinni nassaarisinnaavat.
Akissarsiat sulinermilu atukkat pillugit isumaqatigiinniarnerit maajip 11-ani aallartissapput ullualunni ingerlassangatinneqarlutik. isumaqatigiinniartorissavavut FTR Ane-Marie Petersen, TR Malu Pedersen, TR Henriette Simonsen aamma siulersuisuni ilaasortaq Karline Platou. Taakku ataasinngorpat maajip 4-ani pikkorissassapput. Ilaasortanit siunnersuutinik qujanartumik pissarsivugut. Piumasaqaatit qanoq akeqassanersut paaseriarlugu siulersuisut pisinnaatitsissummik tunniussissapput.

Feriehjælpefonden
Aningaasaateqarfimmit agguaaqammerpugut katillugit 69.000 kr.-nik qinnuteqartunut 15-inut. Agguaanneqarput 4300/1500 kr. Ukiaru oktobarimi agguaaqqissaagut. Katillugit ilaasortat 27-t ukioq manna qinnuteqarsinnaapput. Malittarisassat nittartakkatsinni atuarneqarsinnaapput.

Ukiup sinneranut aaqqissuussinerit/sammisassaqartitsinerit
Ukiup sinnerani ilaasortanut sammisassaqartitsinernut tunngasunik siunnersuuteqarnissassinnut tikilluaqqusaavusi. Pikkorissarnerusinnaapput, ataatsimiititsinerit allalluunniit. Suli pilersaarutigaarput naalakkersuisut allattaannik oqaloqateqarnissaq, ukioq naalakkersuisoqarfinni pisortat oqaloqatiginerisa iluatsilluartup malitsigisaanik. Tamatuma imaqarnilornera nittartakkatsinni atuarneqarsinnaavoq.

Mariia Simonsen, aningaasersoq, siulittaasuugallartoq
kasserer & fung. formand.