Siulittaasup nalunaarutaa 2022

Ukioq ataaseq ingerlariikkatappoq. Suliffeqarfinni amerlanerpaanni corona initusimaqaaq. Killilersuisuutit ullormiit ullormut allanngorartut amerlasuullu angerlarsimaffimminni sulisariaqartarput. TP-imiit ukiup ataatsip ingerlanerani assigiinngitsorpassuarnik suliaqarpugut. Ukioq ilungersunartorsiorfiuvoq.

Siullermik ilaasortat naammagittarsimaqimmata qujaffigerusuppakka. Sulisunut sinniisut ilaasortatsinnut sullissisut immikkut qujaffigerusuppakkattaaq. Taakkuuppummi ilaasortatsinnut qanimut sullissisut. Siulersuisut nammineq kajumissuseq aallaavigalugu sulisut immikkut qutsaviginissaat puiguinnarsinnaanngilagut.

Ukioq 2021 immikkut ittumik ilungersunartorsiorfiusimavoq. Siullermik sulisut sinniisuunerat Ane-Marie erninermi sulinngeqalerpoq. Taanna KNR-imi suleqatigisatsinniit marlunnit taarsernerpoq, ajoraluartumillu sivikitsup ingerlanerani unipput. KNR-imi sulisunut sinniisut aamma allat unerarput, naggataatsigut Henriette kiserngorulluni.  Suli qujanavissumik sinniisuuvoq tamannalu annertuumik qujassutissaqarfigaarput. Sulilu sinniisunik taartissaanillu nunatsinni tusagassiuinermi suliffeqarfimmi annerpaamik amigaateqarpugut. Maanna qujanavissumik Ane-Marie uteqqippoq, taamaammat 2022 qaammanerusumik ingerlajumaartoq takorloorneqarsinnaavoq. Amerlanerit suliffimminni sinniisuunissaminut peqatigiiffilerinissaminulluunniit soqutiginnilernissaat sakkortuumk kaammattuutigaara. Sinniisut amigaatigaagut, taamaammat atorfissaqartippassi. Sinniisut amerlaneruppata ilaasortatsinnut sullissineq pitsaanerulissaaq. Taamaasillutalu suliffeqarfiup sulisullu akornanni ataqqeqatigiinneq qaffarsarsinnaalissallugu.

Siulersuisut DJ-ilu maanna KNR-ip 750 koruuninik tapit aqqutigalugit qaffaarataarneranut tunngatillugu suliaqaleruttorput. Tapi taanna sulisut suliinnarnissaanut siunertaqarluni qaffaaneruvoq, KNR-ilu taamaasiorsinnaasimavoq Namminersorlutik Oqartussaniit 2,5 millionit koruuninik annertunerusumik isumaqatigiissutip qaavatigut tapiiffigineqarnerasigut. Aningaasat ilaasortatsinnut tunniunneqartut qujarutissaapput, kisianni kattuffimmiit aamma tupigusuutigaarput, sooq isumaqatiginninniarfigineqartartut attavigineqarsimannginneranik. Tusagassiutilerinermi suliaqartut peqatigiiffianiit aatsaat allannguisinnaavugut ilaasortatta naammagittaalliorneratigut ilaasortallu sinniisunik atuinerasigut.

Sinniisuunerup erninermini sulinngiffeqrnerani kattuffimmiit ilaasortat ikiorneqarsinnaasimapput, taamaakkaluartorlu suliani ataasiakkaani annertuumik unammillernartarsimavoq. Ilaasortagummi ilaasa suliffimminni oqaloqateqaleraangamik illersuisinnaasumik sanileqarusuttarput. Uangalu siulittaasutut ilaatigut oqaloqatiginninnerni peqataasarsimavunga ilaasortatta illersorneqarnissaat qaffasinnerpaaffissaminiitsinniarlugu. Suliassat taamaattut takutiinnarpaat sulisitsisuniit suliffinnilu atugassarititat eqqarsaatigalugit annertuumik unammilligassaqaratta.

Ilaasortagut suliffimminni ulapinnerulerneq misigileraluttuinnarpaat. KNR-imi Sermitsiaq.AG-imilu isumaqatiginninniarnerni annikitsuinnarmik aningaasarsianik qaffaasarnerit saniatigut sulisut qanoq innerat annertunerusumik tusaaniarneqarneq ajorput. Suliffiulli avataani inuit attaveqaqatigiiffiinni oqariartuutit sakkortusinnaasartut sulisut ataasiakkaat misigisinnaasarpaat. Inuit oqaaseqarsinnaanerulerat peqqinnarpoq, oqaaseqaatillu iluaasinnaasunut, sakkortusinnaasunut, nakkarsaasutulu nipeqarsinnaasunut immitsinnut illersortarnissarput eqqaamasariaqarparput.

TP-ip siulersuisuniit uippakajaarneq suliffimmilu akornusersorneqarneq (chikane) pillugit ukioq manna ukkatarinnippugut. Ilaatigut taakkua pillugit pikkorissartitinerit ingerlappagut, ajoraluartumilli pikkorissarnermi taamaallaat ilaasortat arfineq-pingasut peqataapput. Pikkorissarneq taanna ilaasortatsinnut pilersaarusiorluarlugu avammut saqqummiutiaaraluarparput. Taamaammat ilaasortat ikippallaartut aaqqissuusanut peqataasarnerat aamma unammillernartutut taasariaqarpoq. Kisiannilu suna peqatigiiffik peqataatitsinerunissamik unammilligassaqarneq ajorami? Neriuutigiinnarpara pikkorissaanermi peqataasutuat pikkorissarneq pissarsiaqarfigilluarsimassagaat, uippakajaarneq suliffimmilu akornusersorneqarneq pillugu annertunerusumik ilisimasaqalersimanissaat neriuutigiinnarsinnaavara.

Ukiup naalernerani Mediehusimi Sermitsiaq.AG-imi aningaasarsiat pillugit isumaqatiginninniartoqarpoq. Illuatungeriit tassa Danske Arbejdsgivere aamma DJ isumaqatiginninniarput. Tassanilu sulisut akissarsiaat hunnoruju koruunimik qaffanneqarnissaat anguneqarpoq. Apriilillu aallaqqaataaniit ukiunilu tulliuttuni tapit 180 koruuninik qaffanneqassasut isumaqatigiissutigineqarpoq. Nunatta iluani nutsernerit angalanerillu (frirejse) isumaqatigiissutiniit peerneqarput.

Ilaasortatsialammik toqqaasarneq TP-imiit aallartinneqaqqippoq. 2021-mi Jaaku Lyberth ilaasortatsialattut toqqarneqarpoq. Taannami aalajaalluni ukiuni 20-ni ilaasortaasimavoq peqatigiiffimmilu pisoqassatillugu peqataajuaannarpoq sinniisunillu amigaateqartoqaraangat sassartuaannarluni. Toqqaasarnerit taamaattut ingerlanneqartuassapput ilaasortat siulersuisunilu ilaasortat innersuusisarneratigut.

DJ-imi oktobarip qeqqani Fagligt Stævne ingerlanneqarpoq. TP-mi siulersuisuni ilaasortat sisamat pqeataapput. Peqataanermilu ilaatigut siulersuisuni sulineq, uippakajaarneq akornusersorneqarneq DJ-imilu annertunerusumik attaveqalerneq peqataanermi anguneqarput. Siulersuisuni sulineq peqatigiiffimmilu suliaqarnermi kajumissutsimik sulinerup aqqani pisussaaffiit annertunerusumik ilikkagaqarfigaagut.  

Aningaasaateqarfigut ilaat aamma allannguutigineqarpoq. Restpulja, Namminersorlutik oqartussaniit halv millioninik aningaasaliiffineqarsimasoq maanna nunatta avataanni atorneqarsinnaalerpoq. Tamanna annertuumik alloriarneruvoq, ilaasortagummi nunarput qimallugu ilinniaqqissinnaalerput. Neriuutigaarput amerlasuut taanna aningaasaateqarfik atorluassagaat, taamaakkaluartorlu aningaasat amerliartornavianngillat. Halv millionit nungukkunik taava qinnuteqartoqarsinnaajunnaarumaarpoq,

Julefrokostinut, ataatsimeersuarnernut ilaasortanullu aaqqissuusinernut taakkuttarsimanissinnut qujavunga. Naggataatigullu oqaatigerusuppara TP-mi siulittaasutut tunuartariaqalerlunga. Suliffigami ulapaarfiusorujussuuvoq kingusissumilu aatsaat soraartarlunga. Ilaatigut unnussuarmut peqatigiiffilerisarsimavunga suliassanillu takkuttoqarataaraangat suliffinni ulapaarfioreersumi qaavatigut ulapputissanik takkuttoqartarluni. Ilisimasakkalu annertusinikuummata aalajangerpunga suli siulersuisuni ilaasortaaniarlunga. Ilaasortammi suliffimmilu atugassarititat pillugit annertuumik uummateqarfeqarpunga. Siulersuisunilu ilaasortaanikkut tamakkuninnga suli suliaqarsinnajumaarlunga. Qujanaq tatigalunga siulittaasutut qinernikuugassinnga sulinermi tamanna isumaqarsimaqaaq.

Neriullunga 2022 pikkunarnerujumaartoq, namminerlu kajumissutsimik sulerusuttut amerliumaartut.

Qujanaq,

Nina-Vivi Møller Andersen, siulittaasoq