Peter Olsenimut allakkat ammasut: KNR-ip nutaarsiassaqartitsivia tusagassiortunik amigaateqarnermigut ajaluvoq
KNR-ip nutaarsiassaqartitsiviani kalaallinik tusagassiortussaaleqinerujussuaq Tusagassiuinermi Sulisut Peqatigiiffiata sakkortuumik ernumanartoqartippaa.
Kalaallit Nunaata Radiua inuiaqatigiinnik kiffartuussisutut (public service) ilaatigut pisussaaffeqarpoq nutaarsiassalerineq aqqutigalugu inuiaqatigiinnik ataqatigiissitsissalluni, (politikkikkut) aqutsinermik nakkutiginnittuussalluni inuiaqatigiillu naalakkersueqataanerminni sakkussaannik pilersussallugit. Taamatut pisussaaffeqarnerup naammassiniarnerani tusagassiortut pinngitsoorneqarsinnaanngillat.
Nutaarsiassaqartitsivimmi kalaallinik tusagassiortussaaleqineq nutaajunngilaq, amigaataanerallu sivisuumik ajorsiartuinnarsimasoq ilisimaneqarpoq. Maanna ima ilungersunartigisumik killiffeqalerpoq pissutsit politikkikkut paasineqartariaqalerlutik, 2024-milu akissarsiat pillugit isumaqatigiinniartoqarnissaata tungaanut iluarsiissutaasinnaasunik nassaarniartoqartariaqarlerluni.
Taamaattumik Ilinniartitaanermut, Kultureqarnermut, Timersornermut Ilageeqarnermullu Naalakkersuisumut, Peter P. Olsenimut, apeqqutigerusupparput KNR-ip siunissaa pillugu suleqatigiissitamik misissuisussamik pilersitsiniarluni siorna juunip 23-ani nittartakkakkut saqqummersartumut Journalistenimut oqarnera timitalerneqarsimanersoq, sulinerlu sumut killissimanersoq? Suleqatigiissitaq pilersinneqarpa? Suliai sumut killippat aamma KNR siunissami qanoq ingerlanneqarniarpa? Taamatullu KNR-ip nutaarsiassaqartitsiviani tusagassiortunik, kalaallit oqaasiinik atuisinnaasunik, amigaateqartuarnera qanoq aaqqiiviginiarneqarpa?
KNR-ip nutaarsiassaqartitsiviani tusagassiortunut akissarsiassatut isumaqatigiissutit pisortani atorfinnut allanut unammillersinnaanngilluinnarput, sulinerullu imminut akilersinnaannginnera peqqutaalluni maanna tusagassiortussaaleqisoqarpoq nutaarsiassaqartitsiniarnerlu ajalusoortutut nalilerneqartariaqarluni.
Nutaarsiassaqartitsivimmi sulisut pisinnaasartik sipporlugu suliualerput
Nutaarsiassaqartitsivimmi tusagassiortut teknikkerillu ikittunnguugaluarlutik maanna pisussaaffitik sipporlugit suliualerput, kisianni annertunerusumiik ajunngitsorsiassanik tunineqassanatik.
Akissarsiat appasinnerat kikkunnut tamanut kingunerluppoq. Inuiaqatigiit nutaarsiassanik pingaarutilinnik tusartinneqarsinnaanerat innarlerneqarpoq, soorlu aamma inuinnaat naalakkersueqataanerat, demokratii, taamaalilluni innarlerneqartoq. Tusagassiortunik marlunnik oqaasilinnik amigaateqarnerup aamma kinguneraa sulisut massakkut uippakajaarnissamut qanillimmata, ilaallu taama nalaataqartarlutik.
Tusagassiortut piaartumik amerlineqassappata akissarsiat qaffanneqarnissaat, sipporlugulu sulinermi aningaasanik ajunngitsorsiassaqarsinnaaneq pisortaniit sulissutigineqartariaqarpoq. Ullumikkummi ineqarnermut akiliutit, nerisassat allallu akitsornikuupput, KNR-imilu tusagassiortut aningaasarsiaat qiviaraanni qaammammut naammattusaarnerusariaqarnerujussuaq oqartussanit maanna qiviarneqartariaqalerpoq tusarnaaneqarlunilu. Akissarsianik isumaqatiginninniarnermi kingullermi 3 procentimik akissarsiat katillugit qaffanneqarput, sulilu naammanngerujussuartut pissutsit massakkut takutippaat.
Inuiaqatigiit oqartussaaqataanerat qaffasinnerusumut pitsaasumullu aallassappat tusagassiortut itisiliisinnaasut nutaarsiassaqartitsivimmilu qulaajarluakkanik saqqummiisinnaasut KNR-ip naammattumik akissaateqartilertariaqarpai.
Tusagassiuinermi Sulisut Peqatigiiffianni, TP-mi ilaasortat februaarip 25-anni ataatsimeersuaqataasut.
Inussiarnersumik inuulluaqqusilluta
Oline I. Olsen, siulittaasoq
Oq. +299 58 1613
Kommentarer