KNR-ip nammineersinnaanera kiffaanngissuseqarneralu pillugit
Sapaatip akunnerani matumani Kalaallit Nunaata Radiuanit nalunaarutigineqarpoq inuttassaaleqinermik pissuteqartumik radiukkut tv-ikkullu nutaarsiassanik aallakaatitsisarneq allatut ajornartumik sivikillineqartariaqartoq.
Kalaallit Nunaanni innuttaasunik kiffartuussiviup taassuma inuiaqatigiit naalakkersueqataaneranni qaammarsaanikkut, peqataatitsinikkut oqallitsitsinikkullu pingaaruteqaqisup innuttaasut kissaatigisaannik tunniussisinnaannginnera ernumanartuuvoq.
Kalaallit Nunaata Radiuata inuiaqatigiinnut pisussaaffimminik naammassinninniarnermini tusagassiortunik marluinnik oqaasilinnik pissarsiniarnera tigumminniniarneralu ajornakusoorpoq.
Akissarsiat pillugit isumaqatigiinniartarneq pillugu isumalioqatigiissitat Kalaallit Nunaanni isumaqatigiinniartarnerup eqaallisarneqarnissaanik isumaliutissiissummini innersuussutai soqutigalugit atuarpavut. Innersuussutaat arlallit isumaqatigaavut, kisiannili kajumissaarutigerusupparput isumaqatigiinniartarnerup atuuttup iluani sulisunik pissarsiniarnermi tigumminniarnermilu aporfiusartut qaangerniarlugit suliffeqarfiit sulisullu peqatigiillutik namminneerlutillu aqqutissiorsinnaalernissaannut periarfissiisoqaqqullugu.
Kalaallit Nunaata Radiua pisortat akissarsianut tungasutigut isumaqatigiissutaannut ilaavoq, taamaattumillu ataavartumik sulisussanik aalajaatsunik pilerisaarisinnaanermigut killilersorneqarluni. Assersuutitut taasinnaavarput KNR-ip landskarsimit ukiarmi immikkut aningaasaliissutaasut ilaannit sulisunut tapimik tunniussigaluarnera maanna nikinnaveerutaammat. Tapisialiineq maanna unitsinneqarallarpoq qanoq ililluni isumaqatigiissutinut naapertuuttumik iliortoqarsinnaanerata aalajangerneqarnissaata tungaanut.
Tamatuma saniatigut Kalaallit Nunaata Radiuata aningaasalersorneqarnera patajaannerusariaqarpoq, taamaalillugu suliffeqarfik ungasinnerusoq isigalugu pilersaarusiorsinnaalersillugu.
KNR-i tusagassiuutillu kiffaanngissuseqartut allat Kalaallit Nunaanniittut innuttaasut imminnut atasuusutut misigisimanerannut naalakkersueqataasinnaanerannullu pingaaruteqartorujussuupput. Taamaattumik kaammattuutigerusupparput tusagassiuutit kiffaanngissuseqarnerat naqissuserneqassasoq sulisitsisut sulisullu namminneerlutik aqqutissiuisinnaanngortillugit.
Itisiliinissamut oqaloqatigiinnissamullu piareersimavugut.
Inussiarnersumik inuulluaqqusilluta
Tine Johansen, Dansk Journalistforbundimi siulittaasoq
Nina-Vivi Møller-Andersen, Tusagassiuinermi Sulisut Peqatigiiffiat
Kommentarer