Kiffartuussineq pisussaafiliivoq
Aallakaatitassiaq Mudi TV, KNR TV-mit oktobarip 12-ianni aallakaatinneqartoq,
erseqqilluinnartumik takussutissaavoq tusagassiorfik innuttaasunut pisussaaffeqarluni
kiffartuussisoq tutsuiginartoq qanoq tusagassiortussaanngitsoq.
TV-ikkut aallakaatitassiaq uppernarsaatitaqanngitsumik taamaanneraanernik nalorninartunik tulleriiginnarnik imalimmik KNR-ip aallakaatippagu, tamanna soorunami Tusagassiuinermi Suliaqartut Peqatigiffianut aarlerinartutut isigisariaqarpoq. Mudi TV-mi apersorneqartoq ataasinnguamilluunniit apeqqusiinertaqanngitsumik uppernarsaatissamillu piumaffigineqarani oqalutsinneqarpoq oqarluni Google ukiut 15-it matuma siorna Kalaallit Nunaannut saaffiginnissimasoq Kujataani datacenteriliorniarluni, itigartinneqarsimasorli annilaangassutigineqarmat iluanaarniarfigiinnassagaatigut. Pulaartoq taava oqarpoq ullumikkut koruuninik 100 milliardit 500 milliardillu akornanni tunisatigut isertitaqarsimassagaluartugut Google taamani akuerineqarsimasuuppat. Peqataasut allat uppernarsarneqanngitsunik oqalutsinneqarput kalaallit qallunaanit qaammammut 9.000 kr.-nik akissarsiakinnerusut, uffa suliaat assigiittut kalaallillu ilinniarluarsimanerusut. Aamma oqaatigineqarpoq qallunaat pisortatut atorfinitsinneqartartut kalaallinit ilinniarluarnerusunit misilittagaqarnerusunillu misilittagakinnerugaluarlutik. KNR-ip kingorna nassuerutigigaluaraa suleriaatsinik sanioqqutsineq pisuulluni aallakaatitassiaq piumasaqaatinik uniuisoq aallakaatinneqartoorsimasoq, isumaqarpugut KNR-ip tv-qarfiata tusagassiortutut maligassat pitsaasut pingaarnersiuinerminni qangarsuarli kingullinngortissimagai. Peqatigiiffiup paasiuminaatsippaa tv-qarfik sooq tusagassiortumik aaqqissuisulerneqarsimannginnersoq, taassumami nakkutigissagaluarpaa tusagassiuinermi ileqqorissaarnissamut maleruagassat malinneqarnissaat kiisalu qulakkiissallugu KNR-ip innuttaasunik kiffartuussisussaatitaasutut pisussaaffini naapertorlugit aliikkutassiani aamma tusagassiornermi pitsaassutsimut pingaartitanik malinninnersoq. KNR aallakaatitassiamik tusagassiuinermi ileqqorissaarnissamut malittarisassanik taama malinninngitsigisumik aallakaatitsinermigut aaqqissuisoqarfimmini allani ilaasortatta suliaat tutsuiginartut, tamatigoortut apeqqusiisullu soqutaajunnaarsippaalusooq. Tamatuma saniatigut KNR-imi tusagassiortut apeqqusiinatik tusagassiortarnerannik inuit akornanni isummertarneq sakkortusisippaa. Taamaattumik tusagassiuinermi ileqqorissaarnissamut malittarisassanik malinninnissaminut KNR immikkut pisussaaffeqarpoq, tamannalu malinngippagu kiffartuussisussaatitaasutut uppernassutsi innarlissavaa, saniatigullu tusagassiortut tamaasa tusaamanerlugaatilersinnaallugit.
Inussiarsumik inuulluaqqusilluta
Tusagassiuinermi Sulisut Peqatigiiffiat
Kommentarer